კორპორატიული იოგა

ყველა კომპანიას აქვს თავისი რიტმი და კულტურა; დასაქმებულებს, როგორც ინდივიდებს და როგორც გუნდურად მოთამაშე ერთობას, აქვთ განსხვავებული საჭიროებები. ამ ყველაფრის გათვალისწინებით, ვქმნი პროგრამებს, რომლებიც ადაპტირებულია კონკრეტულად გუნდზე, ორგანიზაციაზე და კორპორატიულ კულტურაზე. გთავაზობთ საცდელ სესიებს, ასევე გრძელვადიან პროგრამებს, რომელსაც მოაქვს სასიკეთო ცვლილებები, ენერგიის მატება, კონცენტრაციის გაუმჯობესება და მოტივაციის ამაღლება.

დასაქმებულთა მენტალური კეთილდღეობა და მათი უსაფრთხოება არის ღირებული აქტივი კომპანიის ზრდის პოტენციალის გაფართოების მიზნით. კეთილდღეობა განიმარტება შემდეგნაირად: „ეს არის მდგომარეობა, როდესაც მიიღწევა წარმატებული საქმიანობა, რომელიც თავის თავში აერთიანებს ფიზიკურ, კოგნიტურ და სოციო-ემოციურ გამართულ ფუნქციონირებას“. ეს არის სფერო, რომელიც მნიშვნელოვანია და შესაძლებელია მისი კულტივირება სამუშაო პროცესში სპეციალური პროგრამების დანერგვით.

დავეხმარები კომპანიებს ჯანსაღი სამუშაო კულტურის ჩამოყალიბებაში, რაც მიიღწევა სწორედ დასაქმებულთა კეთილდღეობის გაუმჯობესებით, სტრესის დონის შემცირებით და სამუშაოს შესრულებასა და ჰოლისტურ ჯანმრთელობას შორის წონასწორობის დაცვით. კორპორატიული პროგრამები თავის თავში აინტეგრირებს სტრესის მართვის კომპონენტს მაინდფულნეს პრაქტიკებით, იოგას ასანების შესრულებით, სუნთქვის კონტროლის სავარჯიშოებით და ნერვული სისტემის რეგულაციით — ეს ყველაფერი ერთად კი ინდივიდებს ასტიმულირებს, რომ იყვნენ უფრო მეტად კონცენტრირებულნი, მიაღწიონ მედეგობას და ჰქონდეთ მეტი შინაგანი ენერგია.

იოგას და მაინდფულნესის ფუნდამენტური მოქმედების მექანიზმი გადის პერსპექტივის, ხედვის ცვლილებაში: ნაცვლად იმისა, რომ ინდივიდი ჩაიძიროს პერსონალურ დრამაში, რაც შესაძლოა მისი ქცევითი პატერნი იყოს, ცნობიერი პრაქტიკების დახმარებით ჩვენ ვახდენთ დისტანცირებას და უბრალო დამკვირვებელი, მოწმე ვხდებით ყოველივე იმისა, თუ რა ხდება ჩვენს გონებაში. როდესაც ფიზიკურ მოძრაობებს ასრულებთ გაცნობიერებულად, ამ პროცესში ჩვენ ვაკვირდებით სხეულებრივ შეგრძნებებს, აზრებს და გრძნობებს და შედეგად ვქმნით, ვაფართოვებთ სივრცეს, რომ ამ ყველა შეგრძნებას უბრალოდ ყოფნის უფლება მივცეთ.